الحلقة الأولى
أعزائي الفنانين اهلا و مرحبا بكم ف اولى حلاقات الفنان... لا لا الحلقة مش للفنانين بس...انا بس زي بيكاسو...شايف ان كلنا بنتولد جوانا فنانين... بس قبل ما تفرح انك فنان....خليني أسئلك هل عمرك اخدت بالك ان المبدعين عامة بينتحروا كتير... اقصد نسبة كبيرة منهم بتقدم على الانتحار مش نفس الشخص بينتحر كذا مرة يا خفيف...
Dalida ,Marilyn Monroe ,Tony Scott, Robin Williams ,Kurt Cobain ,Avicii, Chester Bennington, Ernest Hemingway ,Van Gogh ,Jean-Michel Basquiat
كل دول و غيرهم كتييير مخرجين , مغنيين رسامين ممثلين كتاب ...اختاروا يقتلوا نفسهم سواء بمسدس او مشنقة او جرعة مخدرات زيادة
السؤال هنا...ليه الفنانين او المبدعين عامة هم اكتر فئه من الناس بتقتل نفسها ؟؟
الحقيقة ان المبدعين مش اكتر فئه بتنتحر زي ما كنا متخيلين...وفقاً ل دراسات كتير... وظايف ف مجالات زي المبيعات و رعاية المسنين و المحاماه و الكول سنتر أكثر عرضه للأنتحار من المبدعين. تخيل طول النهار قاعد تقول " افتح الراوتر اقفل الراوتر...فتحي يا وردة قفلي يا ورده "
بس خلاص خلصت الحلقة. هاشتاج خلصانة بسرعة
لا بهزر معاك يا فنان...انا بس قولت اروح اعمل فنجان قهوة بسرعة...
----------------------------------------------------------------------------------------------------
ف الحقيقة لو فكرنا شوية هنلاقي السؤال بيتفرع ل سؤالين...أولهم...
هو ايه اللي يخلي البنى ادم ينتحر أصلا...؟؟
الأجابة القصيرة هي الأكتئاب... مجموعة احداث بتؤثر على كيمياء المخ ف بتسبب لصاحبها الرغبة لأنعزال الحياة او الرغبة في أنهائها.
و هنا نوصل ل تاني سؤال...هو الفنان اللي بيعمل الحاجة اللي بيحبها و معاه ملايين و معجبين و تنين.... مكتئب ليه اصلا...؟؟
الأجابة الطويلة هي كالأتي...
فعل الفن نفسه قائم على الأبتكار ,لو مش بتقدم شيء جديد يبقى فالغالب انت بتقدم صنعه او حرفه
و الأبتكارهو تقديم شيء جديد....
و تقديم شيء جديد ف حد ذاته شيء مخيف.
كل مرة بيحاول فيها حد طرح فكرة جديدة ..... ف الغالب بيقابل بالرفض لأننا كائنات تعشق الروتين و تعبد الأعاده...مش لأن فيها أفاده... عشان ده ف ال DNA بتاعنا...(( مش بندخل كهف غير الكهف بتاعنا عشان ممكن الكهف الجديد يكون فيه نمر يكلنا)) ف غالبا الفن الجديد ده بنقتله بالنقد, او بالسم زي سقراط لما اتحكم عليه يشرب سم نتيجة أفكارة و تعاليمه الجديدة او بالقتال لا بالسم بالقتال. ف تخيل حضرتك يبقى روتين حياتك أنك تنتج أعمال و تترفض او على الأقل لا تقابل بالترحاب كل يوم...شيء مدمر للأعصاب و هادم للسعادة.
اليزابيث جيلبرت كاتبة الروايات و صاحبة كتاب " eat pray love "
بتوصف الضغط العصبي ده ب مقوله it is like asking someone to swallow the sun
ضغط نفسي رهيب حتى لو نجحت هيبقى عندك ضغط فكرة انك تحافظ على النجاح ده و تستمر ف العطاء زي Robin Williams او Kurt Cobain اللى حتى بعد نجاحهم مسلموش من الأكتئاب
الأبداع و المعاناة مرتبطين ببعض , على حد علمي ف مجال الفن التشكيلي مثلاً...مش هتلاقي غير بيكاسو و سيلبادور دالي هما اللي كانوا مبسوطين ف حياتهم و عاشوا كتير...ده لو أعتبرنا ان النرجسية شيء لطيف و مش مشكلة يعني. و ان كنت أرى ان النرجسيه هي اللي وفرت لهم حماية من نقيضها اللي هو الأكتئاب.
طيب وايه اللي بيجبر الانسان انه يبقى فنان و يحكم على نفسه بالمصير المهبب ده؟؟ و ده أجابته بسيطة جداً قالها دييجو ريفيرا ل مراته فريدا كالو ف بداية مشوارها الفني " لو انت رسامه حقيقية هترسمي عشان متقدريش تعيشي من غير رسم , هترسمي او هتموتي "
و ف نهاية الحلقة... متنساش تفكر ف كل اللي أتقال...عشان مفيش مصادر..." من النهاردة مفيش مصااادر أأأأنا المصادر"
و أتفرج على اي حاجة عشان مش هتلاقي حلاقات قبل كده...دي اول اول حلقة... بس تستنانا الاسبوع اللي جاي.
الحلقة الثانية
أعزائي الفنانين اهلا و مرحبا بكم ف ثاني حلاقات الفنان...
$469 700 000
$284 000 000
$227 000 000
Nafea Faa Ipoipo
(When Will You Marry?)
دي من أغلى اللوحات اللي اتباعت ف مزادات... أرقام فلكية لكن نظرية الندرة ممكن تبررها... من الطبيعي لو اعتبرنا اللوحات سلع...ف طبيعي عددها هيحدد سعرها... ف واحد زي ليوناردو دافينشي ...واحد من أهم العقول اللي عاشت على هذا الكوكب , له حوالي 30 لوحة بس هما اللى احنا متاكدين انه رسمهم بالتالي نادرين ...بالتالى غاليين....
لكن اسمع واحد يقولي فلووووس مع تيوس.... وهنا احب أحييك و أروح أعمل فنجان قهوة بن غامق على الريحه و أرجعلك يا فنان
---------------------------------------------------------------------------------------
ف الحقيقة لو فكرنا شوية هنلاقي ان قيمة العمل الفني مش بس ف المحتوى...يعني مش عشان لوحة كلاسيكية باين فيها كل التفاصيل تبقى محترمة و بنت ناس و غير كدة تبقى بنت بوبي.... في معايير تانيه كتير ممكن ترفع من قيمة العمل الفني و اليك بعضها
اولا زي ما قولنا : الندره.... في منها كام واحدة ف الكوكب...الفنان اللى رسمها عايش هيعمل غيرها و لا الله يرحمه
ثانيا: المواصفات ( الحجم و الخامة ) طبيعي لو عملت لوحة ضخمة هتتكلف اكتر و لو أضفتلها مثلا شرائح دهب او برواز فضة سعرها هيزيد...
ثالثا: الوقت و المجهود...اللوحه او التمثال اللي اتعمل ف سنين غير اللي اترسم ف 5 ساعات.
رابعا: كانت عند مين قبل ما تتباع... تخيل تمتلك عربية من عربيات الملك فاروق...ما انت عمرك ما هتسوقها و لا هي اصلا هتقدر تمشي...بس لو معاك هتدفع.
خامسا: أستثمار....لو انت عارف انك لما تشتريها...هتقدر بعد كام سنة تبيعها ب رقم اعلى...هتدفع و ده اللي بيعمله رجال اعمال كتير بالمناسبة .
سادسا: مين الفنان اللي رسمها....اسمع واحد فنان يقوللي بس دي تبقى سطحية اوي مننا ك جنس بشري اننا نقيم لوحة علي اساس اللي راسمها...و هنا احب أقولك... اني مختلف معاك و هسبتلك..بس بطريقة غير مباشرة. مثلا على ثبيل المثال ..... (شهداء يناير ماتوا ف احداث يناير) بطريرك الاقباط...البابا شنوده له مقولات تكاد تكون موجودة ف كل بيت مسيحي.. و ملزوقه على العربيات و الموبيلات ( ربنا موجود ,مسيرها تنتهي, كله للخير) الجمل دي ف حد ذاتها مفيهاش بلاغة او جمال, و لا هي جديدة صادمه...بالعكس دي جمل سمعناها و اتقالت قبله ب مئات السنين...لكنها أكتسبت قيمة لما هو قالها ف ظروف معينة. عشان ده كان رجل مهم...رئيس طائفة من أكبر الطوائف ل ديانة من أشهر الديانات ف العالم و التاريخ.
فطبيعي لما واحد ف منصب وزير ثقافة أكتر من 30 سنة ل بلد ب حجم مصر وكان مرشح ل رئاسة منظمة اليونيسكو زي فاروق حسني...يرسم...اللوحة تكتسب قيمة منه مش العكس. حتى لو شخبطة....اه حتى لو شخبطة...أدخل اي بيت فيه طفل عنده 5 سنين هتلاقي الأم معلقة شخبطة علي التلاجة و بالنسبة لها دي أحلي لوحة فالدنيا. عشااااااااان ابنها او بنتها هما الفنانين و بالتالي قيمة الشخبطة أعلى من وجهة نظرها ك أم
كذلك المجتمع بيعامل لوحات بعض الأشخاص معاملة خاصة بسبب مكانتهم و وضعهم.
هتلر بعد ما مات أتبعله لوحة ب 450 الف دولار ! طبعا مش عشان حلوة...عشان اللي رسمها مختل عقليا ... سياسي و عسكري و رئيس دوله عظمى و سفاح و مختل عقليا عادي يعني.
أسمع نفس الفاااان بيقولي ياسطى بس ده برضو مش بيفسر ليه لوحة ل واحد زي روسكو او بولوك يبيع لوحة ب 140 مليوووون دولار اهي دي ولا نادرة و لا معمولة ب مايه الدهب و لا حد يعرف مين ده اصلا..... أقولك برافو عليك
هنا بقى نتكلم عن المحتوى ....ايه اللي جوه اللوحة دي؟؟ ...الشخبطة دي لها معنى و لا لا ؟؟ الشخبطة دي ليه مهمة و جميلة و غريبة؟؟....بس الاسبوع الجاي انشاء الله عشان ده موضوع كبير كبيييير جدا.....تقريبا 6 او 7 اكس لارج محتاج حلقة لوحده و 3 جرادل قهوة.
و ف نهاية الحلقة... متنساش تفكر ف كل اللي أتقال و تشغل مخك...عشان مفيش مصادر. كل اللي أتقال ده أجتهاد شخصي او ب معنى أخر...هبد و رزع من هنا للصبح . و تتفرج على الحلقة اللي فاتت و تشترك على القناة و تتنطط على صحابك ب كل المعلوات اللى قولتها ف الحلقة.